Pilason ang 15 anyos nga grade 8 student matapos ginbuno sang 18 anyos nga grade 11 student gamit ang kutsilyo sa school canteen sa Buayan National High School sa General Santos City, Lunes sang aga.
Suno kay Soccsksargen police chief PBGen. Alan Manibog, nag-angkon ang biktima sang pilas sa liog kag sa tuo nga bahin sang iya nga tyan.
Gindala siya sang iya class adviser sa isa ka ospital, samtang ang suspek naman ang gin-turn over sa kapulisan.
Narekober naman halin sa suspek ang isa ka folding knife nga may lima ka pulgada nga kalabaon.
Sa imbestigasyon sang kapulisan, pagpangbully sang grupo sang biktima sa suspek ang isa sa mga motibo nga ginalantaw.
Samtang suno naman sa Department of Education-General Santos City, magapatuman sila sang hugot nga inspeksyon sa gate sang eskwelahan kag nagapanawagan sa mga ginikanan sang mga kabataan nga kun mahimo i-monitor man nila ang ila mga estudyante.
