ROXAS CITY – Nagbuligay na karon ang grupo sang mga Capizeño OFW’s sa Saudi Arabia para makita ang missing nga kababayan nga wala nakapauli sa balay sang employer matapos naglagaw kaupod ang mga pakaisa.
Sa exclusive interview sang Bombo Radyo Roxas kay Irene Bendole, sang Barangay Matagnop, Dao, Capiz, isa sa mga nakaupod ni Roselyn Parcon antes nadula sang Lunes, kinaandan na nila nga magpakaisa nga maglagaw kun natapos na nila ang ila nga trabaho.
Aminado si Bendole nga wala nila natawagan si Parcon sang gab-I nga nakapauli na sila gikan sa ila paglagaw bangud kampante sila nga nakapauli ini sa balay sang employer.
Apang daku ang kakibot ni Bendole sang suguran sang pakaisa nga si Yolanda Paro nga gintawagan ini sang employer ni Roselyn kag ginpangita ang OFW matapos nga wala na ini nakapauli sa ila.
Samtang ginkumpirma sini nga sadto nagsugid si Roselyn nga may indi sila pagintindihanay sang mister sa Pilipinas, apang ginpanugyanan nga magpakabakud bangud normal lamang ini sa kabuhi sang mag-asawa.
