Nagalaum ang grupo sang mga mamumugon sa Western Visayas nga ma-aprubahan ang ginaduso nga P200 daily wage increase hike.
Sa interview sang Bombo Radyo kay Elmer Forro, representative sang United Labor-Panay, iya ginpatpat ang mga rason kag tinutuyo sang pagduso sang dugang nga sweldo.
Suno kay Forro, ang ginabaton nga bulanan nga sweldo sang mga mamumugon ang makabig nga below poverty threshold bangud sa pagtaas sang presyo sang mga balaklon, nagnubo man sa P408 ang real value sang minimum wage nga ginabaton kag ang constitution ang nag-set sang cost of living sa isa ka magpamilya sang P1,200 sa kada adlaw nga tuman kalayo sa minimum wage nga P513.
Pahayag niya, kaupod ang mga nagkalain-lain nga grupo sang mamumugon sa Western Visayas ang nagapanawagan sang P200 daily wage hike.
Dugang pa sang natungdan, ang paghugpong sang tanan ang liyabe agud maangkon ang ginahandum nga pagtaas sang sweldo sang mga mamumugon.
Nahibaluan nga nagpatigayon na sang una nga public hearing ang Regional Tripartite Wages and Productivity Board (RTWPB)-6 nahanungod sa nasambit nga hagna kag nagalaum nga sa masunod nga paghinun-anon, mapaboran na ang proposal sang grupo.
