ROXAS CITY -Hugot nga ginapamatukan sang Brotherhood of Riders-Capiz Chapter ang pagpatuman sang ‘Bawal Angkas’ sang Land Transportation Office (LTO).
Ini ang hugot nga ginpanindugan ni Pastor Russel Monton Ban, founder sang nasambit nga grupo sang mainterview sang Bombo Radyo.
Ginpahayag ni Ban nga nahangpan sini ang tinutuyo sang ahensya sa pagpatuman sang physical distancing apang indi ini kumbinsido sa pagdumili sa pag-angkasanay sang magpamilya sa motorsiklo.
Gintawag ni Ban nga mga wala sang alam ang mga katapo sang ahensya bangud wala gintun-an sang maayo antes nga ginpapanaog ang nasambit nga pagsulundan.
Ginabasol man ni Ban ang ahensya bangud wala nagpatawag sang sinapol ukon konsultasyon sa mga eksperto antes ipatuman ang nasambit nga layi.
Gindugang pa sini nga magluwas sa Bawal Angkas, madamo pa sang layi nga ginpatuman sang ahensya nga wala gintun-an sang maayo.
Samtang bukas naman ang mga riders sa tion nga ipatawag sang Land Transportation Office para kuhaan sang sentimyento angut sa ginpatuman nga mga layi sa dalanon.
