Liwat nga ginaduso ni Senator Sherwin Gatchalian ang pagdumili sa paggamit sang social media sa mga menor de edad sa Pilipinas.
Kasunod ini sang ginpatuman sang Indonesia nga ban sa mga bata nga naga-edad 16 panubo sa paggamit sang mga high-risk platform kaangay sang Facebook, Instagram, Tiktok, Youtube kag Roblox.
Suno sa senador, dapat nagahulag na ang gobyerno agud maproteksyunan ang mga kabataan batok sa online exploitation kag iban pa nga delikado nga content.
Nauna na nga ginpanugyanan sang Cybercrime Investigation and Coordinating Center ang mga telco nga maghanda sa posible nga nationwide block sang Roblox bangud sa pamahog sini sa seguridad sang mga kabataan.
Ginpahayag man ni Gatchalian ang resulta sang Programme of International Student Assessment kon sa diin ang kada isa ka oras nga dugang sa paggamit sang digital devices sang mga 15-anyos nga estudyante ang may equivalent nga pagnubo sang ila nga math performances.
Dugang pa, nangin makusog ang panawagan sa regulasyon matapos ginpamatbatan sang Jury sa Los Angeles ang pila ka mga tech companies may kaangtanan sa social media addiction sang mga kabataan.
