ROXAS CITY – Arestado ang duha ka mga indibidwal sa ginkasa nga drug buybust operation sang gintingob nga pwersa sang Philippine Drug Enforcement Agency (PDEA-Capiz) kag Station Drug Enforcement Team sang Roxas City Police Station sa Barangay Culajao, Roxas City.
Ginkilala ang mga nadakpan nga sanday Rommel Tiu, 29 anyos, residente sang nasambit man nga lugar kag Loreto Delgado III, 39 anyos, residente sang Barangay Mongpong.
Narekober sa posesyon sang mga ini ang 7 tanan ka sachets sang shabu nga ginabulubanta nagabalor sang P390, 000, P1, 000 nga buybust money, P18, 000 nga boodle money, cellphone kag pouch.
Suno kay Police Master Sergeant Ramil Arcangeles, tagpamaba sang Roxas City PNP, nga madugay nila nga gin-monitor ang ilegal nga aktibidad sang duha ka mga drug suspek.
Ginpahayag sini nga naglawig sang kapin duha ka bulan ang ila monitoring sa mga ini antes ginkasa ang nasambit nga operasyon.
Natalana nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002 ang nasambit nga mga drug suspek.
