Hampang sa New Zealand sa FIBA Asia, daku nga pagpanghangkat sa Gilas – Brownlee

Ginalauman nga mangin mabug-at ang matabo nga una nga hampang sang Gilas sa second window sang FIBA Asia Cup qualifiers sa palaabuton nga Nobyembre 21, bangud makasumpong nila ang New Zealand suno kay Justin Brownlee.

Ang makaatubang nila nga team nga Tall Blacks ang matandaan nga nagpiyerde sa team sang Pilipinas sadtong nakaligad nga tuig sa 2023 FIBA World Cup Asian qualifiers nga gintambakan sang puntos sa iskor nga 106-60.

Bangud sini, nagsugod na nga magpahuway si Brownlee nagikan sa asud-asod nga paghampang sa iban nga liga agud makapapreparar sa nagahilapit nga hampang sang Gilas sa masunod nga semana.

Dugang pa sini, mangin mabudlay ang bakbakan gani preparahan sini ang iya lawas kag himuon ang bug-os nga masarangan para sa pungsod.