ROXAS CITY – Nagpatigayon sang pagsinapol ang mga hospital officials sang probinsiya agud mahinalaan ang mga lihok agud mapunggan ang pagsulod sang coronavirus disease (COVID-19) sa Capiz ilabi pa nga ginpaidalum na ni President Rodrigo Duterte sa state of public health emergency ang pungsod.
Ang sinapol ang ginpangunahan ni OIC Governor Engineer Edgar Agana kag gintambungan sang magkatuhay sang mga opisyales naggikan sa Provincial Health Office, Roxas Memorial Provincial Hospital kag mga district hospitals sa probinsiya.
Suno kay Hospital Management Section Head Dr. Alex Nolasco kinahanglan nga may pat-od nga plano kun ang mga ospital sa probinsiya agud mangin preparado sa tion nga makasulod ang COVID-19 sa probinsya.
Pila karun ka mga tikang nga ginahimo sang probinsiya amo ang pagpamakal sang Personnel Protective Equipment (PPE’s) nga magamit sang mga doktor kag hospital staff pananglitan nga may mga pasyente sang COVID-19 nga ma-admit sa ila ospital.
Samtang bilang tikang agud makalikaw sa balatian ang mga empleyado sang kapitolyo subong man ang publiko nga nagapadulong diri, nag-aman sang mga hand sanitizers kag alcohol ang mga departamento diri.
