ROXAS CITY – Patay ang 29-anyos nga lalaki matapos nga ginluthang sang kaugalingon nga tiyo sa Sitio Ilaya, Barangay Matnog, Ivisan, Capiz.
Ginkilala ang biktima kay Rowel Varcas, samtang ang suspek ang ginkilala kay Gary Varcas, legal nga pang-edaron lunsay mga residente sang nasambit nga lugar.
Sa interview sang Bombo Radyo kay Welma Varcas, iloy sang biktima, nasaksihan gid sini ang kinagamo kag pagpangluthang ni Gary sa iya nga bata.
Suno diri, nag-ugat ang kinagamo sang nagpadulong sa ila balay ang suspek agud kuntani makighinala sa iya bana, apang nagpalibad ang iya bana nga makig-istorya bangud yara ini sa idalum sang makahulubog nga ilimnon si Gary kag ginhinyu nga magpauli na kag sa masunod na lang adlaw maistorya.
Apang, ginkakibot na lang ni Welma, nga nagbalik sa ila balay ang suspek nga may bitbit nga armas-luthang kag ginhangkat sang tapungolay ang iya bana apang wala sa gihapon ini nga ginsapak tubtob nga ginbadlong na lang ini sang biktima.
Pahayag pa ni Welma, nga ginhakos pa sang iya bata ang suspek kag nagpakitluoy agud mauntat na ang kinagamo apang ginwakli ini ni Gary kag ginsumbag nga gintunaan sang pagkatumba kag madasig nga ginluthang.
Ginpadangat pa sa ospital ang biktima apang ini ang gindeklarar nga dead on arrival sang doktor, samtang naka-ospital arrest naman ang suspek matapos nadakpan sang kapulisan.
Desidido naman nga magpasaka sang nagakaigo nga kaso si Welma batuk sa iya bayaw agud mahatagan sang hustisya ang kamatayon sang iya bata.
Samtang, nagapadayon pa sa karon ang imbestigasyon sang kapulisan sa nasambit nga insidente.
