ROXAS CITY – Ginbawian gid sang kabuhi samtang ginabulong sa ospital ang biktima nga gin-buno sang iya kaugalingon nga Tiyo sa Sitio Nipa, Brgy. Culasi, sini nga syudad.
Ginkilala ang biktima kay Rogen Villanueva alyas force, residente sang nasambit nga lugar samtang ginkilala naman ang suspek kay Bregider Combate, residente sang Brgy. Lanot, Roxas City.
Mahibaluan nga samtang nagapungko ang biktima sa tricycle kaupod ang iya abyan hinali na lang ini ginpalapitan sang iya tiyo kag ginbuno sang maka-apat ka beses sa tiyan.
Nakita pa sa crime scene ang gingamit nga kutsilyo sa pagpang-buno.
Aminado ang tiyo nga nagbuno-patay sa iya gumangkon nga may daan na sila nga hiligut-anon sang biktima kag wala sini ginahinulsolan ang krimen nga iya nahimo.
Ini ang ginpahayag ni Bregider Combate sang ma-interview sang Bombo Radyo.
Suno kay Combate, nga nagpadulong siya kaina sang hapon sa balay sang iya bata sa Sitio Nipa, Brgy. Culasi kag nakita niya ang biktima nga yara nagapungko sa tricycle kag ginpahayag sini nga ginapabati-batian siya rason nga nagkuha ini sang kutsilyo kag ginbuno ang biktima sa tiyan.
Dugang pa sini, nga masami nalang siya ginahangkat sang iya hinablos kag ginapahog nga pagapatyon gani natak-an na siya kag iya na ini nga gin-unahan.
Ginklaro man sini nga wala siya sang plano nga magpalagyo sa baylo nagpauli ini sa ila kag boluntaryo nga nagsungka sa ila barangay kapitan nga si Kapitan Totong Tuazon sang Brgy. Lanot.
Sa karun, yara na ang nasambit nga suspetsado sa kustodiya sang Roxas City PNP kag handa nga paga-atubangon ang kaso nga igapasaka batuk sa iya.
