ROXAS CITY, CAPIZ – Isa ka maragtason nga hitabo ang napagkit sang Capiz State University (CAPSU) matapos pangunahan ni House Speaker Ferdinand Martin Romualdez ang ika-21 Commencement Exercises sang unibersidad bilang Guest Speaker.
Ginhiwat ang prestihiyoso nga seremonya sa Capiz Gymnasium, Villareal Stadium, Roxas City, kun sa diin ginabanta masobra 5,000 nga estudyante gikan sa nagkalain-lain nga kampus sang CAPSU ang dululungan nga nagsuksok sang ila nga toga kag ginbaton ang bunga sang ila nga pagtimakas sa kolehiyo.
Ini man ang labing una nga kahigayunan nga nangin kabahin si Speaker Romualdez sa isa ka daku nga aktibidad sa CAPSU, nga ginkalipay sang pamunuan, faculty, kag mga estudyante sang unibersidad.
Sa iya nga speech, ginganyat ni Romualdez ang mga nag-gradwar nga gamiton ang ila nga kaalam kag talento sa matuod nga pagbag-o sang pungsod.
Ginhatagan man sini sang pagtamod ang papel sang kabataan bilang masunod nga henerasyon sang mga lider nga magadala sang paglaom sa kada Pilipino.
Bitbit ang tema nga “One CAPSU: Working Together, Going Stronger, Reaching Higher,” nangin inspirasyon ang mensahe ni Romualdez sa mga nag-gradwar, kun sa diin iya ginhatagan sang importansya ang paghiliusa, determinasyon, kag edukasyon bilang liyabe sa kadalag-an.
Ginpahayag man ni Romualdez ang suporta sang Manubo nga Panalgan sang Kongreso sa sektor sang edukasyon kag ginpasiguro nga magapabilin nga prayoridad sang gobyerno ang paghimo sang mas madamo nga oportunidad para sa mga kabataan nga Pilipino.
Tuman ang pagpasalamat sang CAPSU sa pagtambong sang House Speaker nga nagserbe nga inspirasyon indi lamang sa mga nag-gradwar kundi mangin sa bug-os nga komunidad sang unibersidad.
