Antes mag-umpisa ang una nga session sa katapusan nga adlaw saNg confirmation of charges hearing batok kay Duterte nagpahanumdom si ICC Pre-Trial Chamber I presiding Judge Iulia Motoc sa legal defense counsel nga si Atty. Nicholas Kaufman nga dapat respetuhon sini ang pagsulundan kaangot sa redactions.
Ini matapos makapila gin-utod ang live broadcast bangud may ginapanglawag si Kaufman nga mga impormasyon kaangay sang hayo kag posisyon nga mahimo maka-identify sang mga testigo kag drug war victims nga involved sa kaso.
Sa pagpadayon sang submission of merits sang Kampo ni Duterte, Ginpanindugan sang legal defense ni Duterte nga si Nicholas Kaufman nga ang paggamit sang tinaga nga “high-value target” (HVT) sa prosecution brief batok kay anay Presidente Rodrigo Duterte ang indi pamatuod sang plano nga pagpatay.
Suno kay Kaufman, ang HVT isa lamang ka operational classification nga ginagamit sang mga nagapatuman sang kasuguan sa pagdeterminar sang mga prayoridad sa mga operasyon batok sa droga, kag indi ini isa ka “code” para sa mando sa pagpatay.
Suno sa iya, madamo sang mga operasyon batuk sa ginatawag nga HVTs ang natapos sa pag-aresto ukon pagsungka, apisar nga ang iban ang nagresulta man sa kamatayon bangud sa engkwentro.
Dugang pa ni Kaufman nga ang tagsa ka insidente ang kinahanglan nga i-analize sang isa-isa kag indi bastante nga i-link si Duterte base lamang sa klasipikasyon ukon testimonya sang mga insider.
Gisaysay ni Nicholas Kaufman, lead defense counsel ni Former President Rodrigo Duterte, nga wala sang ebidensya nga ginpeke ukon ginretoke ang mga police reports kag iban pa nga dokumento sa tion sang pagpangpatuman sang drug war.
Suno kay Kaufman, “No proof, whatsoever, of this supposed falsification in the entire case record.”
Matandaan nga ginpresentar sang prosekusyon ang kaso ni Kian delos Santos sang Martes.
Suno sa prosekusyon, sa pila ka operasyon sang pulis, ginatamnan ang crime scenes sang armas, droga, ukon kwarta, kag gina-falsify ang police reports agud ipakita nga ang operasyon amo ang ‘acts of self-defense.’
Ginpunto man sang prosekusyon nga madamo nga kaso ginatawag nga “nanlaban” para i-describe ang mga insidente kun sa diin ginpahayag nga nagdepensa ang kapuisan sa ila kaugalingon.
Pagkatapos nga nagdeliver sang statement ang defense team ni Duterte, ginpabati sa closing statement sang prosecution sa confirmation hearing sa International Criminal Court, ang mga tinaga nga nagkawas mismo sa bibig ni former President Rodrigo Duterte sang yara siya sa Hong Kong inadlaw lang antes siya gin-aresto sa Pilipinas.
Gintawag ini ni ICC senior trial lawyer Julian Nicholls nga “farewell speech” ni Duterte.
Sa amo man nga speech, naghinugyaw ang mga Pilipino sa mga statement ni Duterte samtang nagahingyo ini nga kun amo gid man ini ang iya swerte sa kabuhi, mag-amot-amot na lang ang mga Pinoy agud nga patindugan siya sang monumento kag ipatupad sa rebulto ni Jose Riza kun makaguwa siya sa presuhan.
Gin-highlight ni Senior Trial Lawyer Julian Nicholls halin sa Office of the Prosecution ang nagasumpakilay nga pahayag ni Atty. Nicholas Kaufman samtang ginadepensahan sini si former President Rodrigo Duterte.
Sang opening statement ni Kaufman sa una nga adlaw sang confirmation hearing, gintodo sini ang pagdayaw kay Duterte kag ginkumparar pa ini kay President Bongbong Marcos.
Sang amo nga tion, nagsiling siya: “Duterte’s word was his word and the people knew it.”
Apang suno kay Nicholls, sang nahangawa na si Kaufman sa pag-ako anay ni Duterte nga may yara siya sang death squad, naglain naman ang tono sang defense counsel.
Gintapos na sang International Criminal Court (ICC) Pre-Trial Chamber I ang confirmation of charges hearing batok kay former President Rodrigo Duterte.
Sa ikaapat nga adlaw, ginpabati sa judges ang closing statements sang tanan nga mga partido nga ginalakipan sang prosekusyon, common legal representatives sang drug war victims, kag defense.
Suno kay Presiding Judge Iulia Motoc, maga-deliberate ang chamber kag magapaguwa sang desisyon sa sulod sang 60 ka adlaw kun ipasaka bala ang kaso ni Duterte para sa trial.
