Nagtakop na ang ikaduha nga adlaw sang confirmation of charges hearing batok kay Former President Rodrigo Duterte.
Sa pag-umpisa sang hearing, gin-athag sang prosecution, legal representatives sang mga biktima kag defense counsel ni Duterte nga may pagbag-o sa mga indibidwal nga kaupod sang ila kampo.
Sa una nga bahin sang session, ginpadayon sang prosecution sang International Criminal Court (ICC) ang submission sang mga ebidensya kag argumento sang merito sang crimes against humanity case ni former President Rodrigo Duterte.
Suno kay ICC Trial Lawyer Edward Jeremy sang Office of the Prosecutor, ginpakita sini ang memorandum nga ginpanagtag sa mga katapo sang Philippine National Police (PNP) sa idalom sang Duterte administration nga naga-unod sang “anti-illegal drugs campaign plan” ukon mas kilala sa tawag nga ‘Oplan Tokhang’.
Ini nagatuyo nga ma-“neutralize” ang problema sa iligal nga droga sa Pilipinas.
Pirmado man ini ni anay PNP chief kag subong Senator Ronald “Bato” Dela Rosa nga una na ginhingadlan sang ICC bilang co-perpetrator sa drug war.
Lakip ang mga laragway,kag dokumento kaangay sang ginatawag nga “Duterte list” bilang ebidensya agud mapamatud-an ang “neutralization” sa idalom sang war on drugs sang nagligad nga administrasyon.
Ginpagwa man ni Jeremy ang mga video sang anay Presidente nga nagapakita sang mga ginpangbuy-an nga mga tinaga sang ini pa ang nagadumala sa nasambit nga kampanya batok sa iligal nga droga.
Suno pa sa prosecution, ang mga ginpresentar nga ebidensya nagakaigo lamang agud mapamatud-an ang mga natabo nga pagpamatay sang administrasyon sang anay Presidente.
Pagkatapos sang una nga session, gintalakay sang International Criminal Court (ICC) prosecution ang ginaalegar co-perpetrators ni former President Rodrigo Duterte sa crimes against humanity case sadtong nagapungko ini bilang mayor sang Davao City kag presidente sang Pilipinas.
Lakip diri sanday Sen. Bato dela Rosa, anay justice secretary Vitaliano Aguirre II,kag iban pa nga anay opisyal sang administrasyon ni Duterte.
Ginpaguwa ni ICC Trial Lawyer Robynne Croft ang dugang nga data kag ebidensya agud pamatud-an ang pagluntad sang widespread, systematic attack sa idalum sang administrasyon ni Former President Rodrigo Duterte.
Samtang nagapadayon ang hearing, mismo si ICC trial lawyer Croft ang naghatag sang bag-o nga impormasyon sa korte.
Nakasentro ang presentasyon ni Croft sa maduguon nga implementasyon sang kontrobersyal nga war on drugs sang nagligad nga administrasyon.
Ang prosecution sang ICC nagasiling nga ang mga data kag mga dokumento nga ginpresentar magapamatuod nga ang serye sang mga pagpamatay indi lamang mga isolated incidents.
Sa baylo, ginapanindugan nila nga kabahin ini sang malapnagon kag plano nga pag-atake nga direkta nga nagpuntirya sa mga sibilyan sa Pilipinas.
Samtang, ginsuportahan naman sang Principal Counsel of the Office of the Public Counsel for Victims nga si Paolina Massidda ang mga ebidensya sang Prosecution sa kaso nga crimes against humanity nga ginakaulamiran ni anay President Rodrigo Duterte.
Suno kay Massidda, ang gin-presenter nga ebidensya importante agud mapamatud-an ang mga alegasyon sang extrajudicial killings kag sistematiko nga paglapas sa kinamatarong sang tawo.
Gindugang pa sini nga ginapresentar sang mga ini ang mga pamilya nga indi makakadto sa ICC, mga iloy nga naglubong sang ila mga anak nga lalaki, mga kabataan nga nadulaan sang ginikanan, mga asawa nga subong nagaisahanon sa pagpadako sang ila pamilya, kag mga komunidad nga sa sulod sang pila ka tuig nagkabuhi sang may kahadlok bangud natabo ang kaangay nga buluhaton.
Ginpamatukan sini ang release plea ni Former Presidente Rodrigo Roa Duterte sa ikaduha nga adlaw sang confirmation of charges hearing may kaangtanan sa crimes against humanity case.
Dugang pa ni Massidda, ang ginatawag nga anti-drug campaign sang nagligad nga administrasyon wala gintuyo nga punggan ang iligal nga drug trade kundi sa baylo nangin isa ka pag-atake sa mga imol nga komunidad.
Gin-athag sini nga ang paggamit sang shabu sa mga low-income areas ang masami nagaserbe nga coping mechanism para sa mga residente bangud sa kakulang sang mental health services, nagakaigo nga edukasyon, kag trabaho.
Sa ikatlo nga session, ginhatagan man sang kahigayunan si Atty. Gilbert Andres, isa sa mga common legal representative sang mga biktima sang war on drugs, nga maghatag sang dugang nga pahayag agud nga ilaragway ang mga biktima sang Extra Judicial Killings.
Suno kay Andres, kalabanan sa mga gina-alegar biktima amo ang mga imol, mga amay, kag minimum wage earners sa Pilipinas.
Lakip man ang mga wala sang trabaho kag ang mga nabudlayan makakita sang permanente nga trabaho.
Pahayag pa niya, ang war on drugs campaign ni Former President Rodrigo Duterte indi away agud punggan ang iligal nga droga kundi makabig nga “war against the poor” .
Dugang pa niya, ang pagpamatay sa tion sang administrasyon ni Duterte ang nagtuga sang kahalitan kag epekto sa mga pamilya, mga naulila nga kabataan, subong man sang tuman nga trauma kag pag-antos para sa mga himata nga ginbilin sang mga biktima.
Samtang, wala naman makapahayag sang depensa ang legal counsel ni former President Rodrigo Duterte.
Maga-resume ang confirmation of charges hearing sa huwebes nga adlaw, Pebrero 26 tubtob Pebrero 27.
