PANAY,CAPIZ – Padayon nga ginabantayan sang mga otoridad ang iligal nga pagpangisda sa banwa sang Panay, Capiz.
Ini matapos madakpan ang tatlo ka mga indibidwal bangud sa illegal fishing sa baybayon sang banwa sang Panay.
Ang mga nadakpan amo sanday Alyas Cris, Alyas Isaac, kag Alyas Elmo nga lunsay residente sang Brgy. Casanayan, Pilar, Capiz.
Sa interview sang Bombo Radyo kay Police Captain Eric Deocampo, hepe sa sang Panay Municipal Police Station, iya ginpoahayag nga narekober sa mga nadakpan ang isa ka pump boat, motor engine, fishing nets nga kompleto sang kagamitan, kag mga isda nga nagabug-at sang masobra 100 kilos.
Suno kay Deocampo, ginabulubanta nga naglab-ut sa ₱160,000.00 ang kabug-osan nga kantidad sang mga isda.
Pahayag pa niya, padayon ang ila pahanumdom sa mga manugpangisda nga likawan ang iligal nga aktibidad sa kadagatan kag magkuha sang nagakaigo nga permit.
Sa subong, temporaryo nga yara sa kustodiya sang Municipal Environment and Natural Resources Office sang Panay ang mga nadakpan, lakip na ang mga ebidensiya, para sa nagakaigo nga disposisyon.
INTERVIEWED BY: BOMBO VINZ DEOCAMPO
