ROXAS CITY-Ginpanindugan sang 30-anyos nga iloy nga manugbata nga lunsay kabutigan ang nangin depensa sang pamunuan sang City Health Office natuhoy sa pagpamalibad sa iya sang tion nagpadulong ini sa birthing clinic agud nga makaanak.
Sa interview sang Bombo Radyo sa kay Liezel Anonoy, residente sang Barangay Culasi sining siyudad ginpahayag sini nga kabutigan ang ginpahayag ni Dra. Lory Cahilog sang nainterview sang Bombo Radyo.
Suno kay Anonoy nga may yara ini sang ginpakita nga laboratory results nga ginhatag sini sa wala makilala nga staff sang birthing clinic sang City Health Office.
Ginpanindugan sini nga wala ini gilayon nga nagbiya sa clinic kag naghulat sang desisyon apang ginpakamaayo niya nga magbiya na lamang bangod ginpalakat ini sang staff.
Ginpanidugan man sang ginang nga manugbata na ini sang tion nga nagpadulong sa City Health Office kabaliskaran sang pahayag sang mga staff.
Samtang nakahanda naman ang ginang nga mag-atubang sa mga staff sang nasambit nga talatapan kun ipatawag ni Roxas City Mayor Ronnie Davidas.
Sa karon, ginmanduan na sang alkalde nga magpatigayon sang imbestigasyon sa City Health Office kag sa duha ka mga birthing clinics sa siyudad nga nagpamalibad sa manugbata nga iloy bangod sang ginaalegar diskriminasyon.
