ROXAS CITY – Indi sa gihapon makapati ang isa ka iloy sa nadangatan sang iya anak nga may kasablagan sa lawas nga napatay sa pagkasunog sang ila balay sa Sitio Guintunuran, Barangay Natividad, Pilar, Capiz.
Ang nasambit nga biktima ang naga-edad sang 7 ka tuig kag ginapahayag nga may yara sang ‘polio’.
Suno sa iloy sang napatay nga biktima nga si Renebe Hito, ginpaliguan pa sini kag ginpainom sang gatas ang anak antes ginbayaan agud magpadulong sa gina-trabahuan sini nga carinderia.
Suno diri nga iya ginbilin ang anak sa iya lola bangud naga-biyahe man sang trisikad ang iya nga bana.
Ginpahayag sini nga nakapauli pa ang iya bana kag ginpatulog ang anak apang ginbilin niya ini sang makadali agud magkadto sa dagat.
Nakibot na lamang si Renebe sang gintundaan siya nga nasunog na ang ila balay kag nabilin sa sulod ang iya anak.
Gintinguhaan pa suno diri nga salbaron ang bata apang bangud sa tuman nga aso kag kalayo, wala na ini matabangan sa sulod.
Ginpahayag pa ni Renebe nga indi man makasinggit agud magpangayo sang tabang ang iya anak bangud may problema ini sa paghambal.
Posible suno sa ginang nga ang ceiling fan sa ginahigdaan sang iya bata ang gintunaan sang sunog.
Base naman sa inisyal nga imbestigasyon sang mga otoridad, ‘faulty wire’ ang rason sang pagkasunog sang amo nga balay.
Ginabulubanta naman nga nagalab-ot sa P10, 000 ang kahalitan nga natuga sa pagkasunog sang nasambit nga balay nga human sa light materials.
