Gin-umpisahan na ang imbestigasyon sang ginaalegar cartel sa industriya sang langis agud maamligan ang publiko batok sa wala untat nga pagsaka sang presyo sang petrolyo.
Suno kay House Senior Deputy Minority Leader kag Mammayang Liberal (ML) Party-list Rep. Leila de Lima, bug-os ang iya nga suporta sa pag-imbestigar sang posible overpricing kag profiteering sang dalagku nga kumpaniya sang langis, ilabi na sa tunga sang oil price shock nga na-eksperyensyahan sa pungsod.
Ang lihok ni De Lima ang nagapabaskog sang nauna nga inisyatibo ni House Ways and Means Committee Chair Miro Quimbo. Madumduman nga nagpanawagan si Quimbo sa Philippine Competition Commission (PCC) kag Energy Regulatory Commission (ERC) nga magpatigayon sang madalom nga imbestigasyon angut sa ginapahayag pagkunsabo sa pag-fix sang market price.
Sa ginpatigayon nga hearing sang Legislative Energy Action Development (LEAD) Council sa Kamara ginkumpirmar ni Department of Economy, Planning, and Development (DepDev) Secretary Arsenio Balisacan nga mandato sang PCC kag ERC ang pagtumod kag pagsilot sa ano man nga anti-competitive practices nga direkta nga nagapataas sang gasto sa gatong.
