ROXAS CITY, CAPIZ- Nagapadayon ang imbestigasyon sa hepe sang Maayon Municipal Police Station natuhoy sa ginapahayag sang tatlo ka mga maestra sang Maayon National High School nga nangin arogante ang pagtratar sini sa ila.
Ang hepe sang nasambit nga police station amo si Police Captain Mark Anthony Garcia.
Sa interview sang Bombo Radyo kay Police Captain Merry Chris Dela Cruz, Police Information Officer sang Capiz Police Provincial Office kag Hepe sang Panitan Municipal Police Station, iya ginpahayag nga bilang kabahin sang pagpaathag sang ginareklamo nga hepe, naghatag ini sang counter affidavit.
Suno kay Dela Cruz, ginpanginwala sang nasambit nga hepe ang mga alegasyon kag reklamo nga ginahaboy batok sa iya sang tatlo ka mga manunudlo kag ginsiling nga wala nya sini gintratar sang malain ang amo nga mga maestra.
Nahibaluan nga nag-ugat ang amo nga mga alegasyon kag reklamo matapos nga personal nga nagpadulong ang mga manunudlo sa talatapan sang amo nga hepe agud kuntani magpabalhag sang reklamo natuhoy sa pagpanakit sa ila sang isa ka Grade 12 student. Apang, ginsiling sang mga ini nga kaangay wala sila gin-abebar mayad sang natungdan.
Pahayag pa ni Dela Cruz, yara na sa talatapan sang Provincial Investigation and Detective Management Unit (PIDMU) ang mga ebidensya nga ginpasa sang mga tagreklamo nga mga manunudlo.
Nagpasalig naman ang natungdan nga himuon sang ila nga talatapan ang tanan agud mahibaluan ang kamatuuran. Pananglitan nga mapamatud-an nga may sala ang amo nga hepe, pagapasakaan ini sang kaso administratibo sa idalom sang National Police Commission (NAPOLCOM) Memorandum Circular No. 2016-002.
Nagpanawagan naman ang tagpamaba sang Capiz Police Provincial Office sa tanan nga mga kapulisan, nga abebaron nga may pagtahod ang tagsa ka mga indibidwal nga magapadulong sa tagsa ka mga police station.
Interviewed by Bombo Sunnie Mae Constantino Batencila
