Igapadayon sang Senado ang imbestigasyon may kaangtanan sa operasyon sang Philippine National Police (PNP) sa compound sang Kingdom of Jesus Christ (KOJC) sa Davao City agud pangitanon ang pugante nga si Pastor Apollo Quiboloy, suno kay Senador Ronald “Bato” dela Rosa.
Suno kay Dela Rosa, magatalana sang panibag-o nga pagsinapol ang Senate Committees on Justice and Human Rights kag Public Order and Dangerous Drugs may kaangtanan sa operasyon sang PNP sa KOJC compound nga nagsugod sadtong Agosto 24, 2024.
Wala pa man gin-anunsyo ang schedule kag venue sang nasambit nga pagsinapol.
Matandaan nga sadtong tinalikdan nga adlaw kung sa diin ginpangunahan ni Dela Rosa ang public hearing, kaupod sanday Senador Robin Padilla kag Senador Christopher “Bong” Go, nga may tinutuyo nga imbestigahan ang mga isyu nga nagaguha sumugod nga ginsuguran sang PNP ang operasyon sa compound, kalakip na sa Jose Maria College (JMC) kag KOJC cathedral.
Ang nasambit nga pastor ang nagapangatubang sang mga kaso nga “ANTI-TRAFFICKING IN PERSONS ACT OF 2003 (RA9208 AS AMENDED BY RA 10364), REPUBLIC ACT 7610 (SPECIAL PROTECTION OF CHILDREN AGAINST ABUSE, EXPLOITATION, AND DISCRIMINATION ACT), AND CONTEMPT OF COURT.”
