Ginpaandaman ni incoming US Secretary of State Marco Rubio ang China nga dapat untatan na ang pagginahod sini sa Pilipinas kag Taiwan.
Sa confirmation hearing sa US Senate Foreign Relations Committee sa nomination ni Rubio bilang US Secretary, ginhayag sini nga ang mga aksiyon nga ginapaguwa sa karon sang China ang sobra nga makahalaliy, ginapuwersa suno sini ang Amerika nga maghimo sang counteractions bangud may commitments sa Pilipinas subong man sa Taiwan nga ila naman nga ginapadayon.
Dugang pa sang Republican Senator nga kun luyag sang China nga nagahimo sang pamaagi agud mangin mapag-on ang relasyon sang US kag China, dapat untaton sini ang pagginahod sini sa Taiwan kag Pilipinas bangud ginapilit sini nga ituon ang ila atensiyon sa mga pamaagi nga indi sa mga ini luyag nga himuon.
Ginpaandaman pa ni Rubio nga dako ang mangin epekto sa bilog nga kalibutan kun may yara sang anuman nga “miscommunication ukon inadvertent conflict” sa pagpangharass sang China sa disputed waters, nga magaduso sa US agud depensahan ang PH bilang treaty ally ukon kaalyado sini.
Pahayag ni Rubio, sa tunga sang panibag-o nga development sa West Philippine Sea kun sa diin padayon ang iligal nga deployment sang barko sang China sa katubigan sang Pilipinas malapit sa Zambales nga ginahalimbawa ni Rubio bilang harassment.
Si US Sen. Rubio, ang ginpahamtang ni US President-elect Donald Trump nga mamuno sa State Department kag mangin uccessor ni outgoing Secretary of State Anthony Blinken.
Samtang, nagapati naman si Rubio nga importante nga mapabaskog pa ang relasyon sang Pilipinas kag US.
Nahibaluan nga sa mga nakaligad nga tuig, tayuyon nga nabuhinan ang military presence sang US sa Pilipinas kasunod na man sang pila ka mga desisyon sang nakaligad nga administrasyon.
Pero suno kay Rubio, mabatyagan ang liwat nga pagbalik sang naga-init nga relasyon sa tunga sang Pilipinas kag US sa idalom sang bag-o nga administrasyon. Sa pihak sini, gin-athag sang incoming US State Secretary nga indi dapat magpokus sa pagiging militarized zone sang PH ukon magpokus lamang sa security arrangement, dapat man suni nga talupangdan ang economic partnership sa tunga sang duha ka pungsod.
