ROXAS CITY – Nangin madinalag-on ang negosasyon sa tunga sang mga mangunguma kag financier nga ila gina-utangan matapos nga nahisugtan ang pagpanubo sa 2.5 porsyento nga interes tagsa ka bulan.
Suno kay Mr. Angelo Orence, coordinator sang Anakpawis-Capiz nga nangin positibo ang resulta sang negosasyon sa banwa sang Dumarao nga ginpatigayon sang Abril 8 sa diin nalipay ang mga mangunguma sang mais kag palay bangud napanubuan ang 5 tobtob 10 porsyento nga interes sa ila ginautang sa 2.5 porsyento.
Aminado si Orence nga indi tanan nga mga financier sa banwa sang Dumarao ang nagpabor nga mapanubuan sa 2.5 porsyento ang interes sa gina-utang sang mga mangunguma, apang daku na nga bagay ang paghatag kunsiderasyon sang iban nga mga negosyante.
Nakasugtan man nga otomatiko nga indi magsukot sang interes ang mga financier sa utang sang mga mangunguma pananglitan nga magdeklara ang banwa ukon barangay nga apektado sang kalamidad ang mga pananum sa ila lugar.
Ginpahayag pa ni Orence nga ini nga inisyatibo ang madugay na nga ginahimo sang KAMACA kag Anakpawis nga tuyo mahatagan sang tingog ang mga mangunguma.
Magluwas sa banwa sang Dumarao nga nangin madinalag-on ang negosasyon, nakaangkon man sang positibo nga resulta ang negosasyon sa banwa sang Maayon sadtong Marso 26 kag buwas nga adlaw naman patigayunon ang negosasyon sa banwa sang President Roxas, Capiz.
Samtang liwat nga nagpanawagan ang Anakpawis kag KAMACA sa kandidato nga tutukan ang problema sang mga mangunguma sa baylo nga maghinabuyanay sang isyu sa isa kag isa, bangud ang mga mangunguma ang nagapakaon sa komunidad.
