ROXAS CITY – Nakibot kag halos indi makapati ang punong barangay sang Barangay Lanot sining siyudad matapos nga may isa ka Locally Stranded Individual ukon LSI nga nakapauli sa ila barangay nagikan sa Metro Manila apisar nga temporaryo ini anay gindumilian.
Sa interview sang Bombo Radyo kay Punong Barangay Rolando Tuazon nga nakibot na lamang ini sang may nagpalab-ot sa iya nga may isa ka LSI nga nagpauli sa ila barangay nga wala sang permiso gikan sa iya.
Suno kay Tuazon nga wala ini kabalo kun ngaa nakapauli ang amo nga LSI sa ila nga barangay rason nga wala man ini nakapanginlaman kag nakapreparar sang quarantine facility sa ila nga barangay.
Ginpahayag ni Tuazon nga nagkadto pa ang ginikan sang amo nga LSI sa ila balay agud maghinyo nga pahanugotan ini nga makapauli sa probinsya basta kabigon lamang ini nga APOR ukon Authorized Person Outside Residence.
Apang, nagpamalibab ini sa luyag nga matabo sang ginikanan bangud ginadumilian pa subong ang pagpapauli sa mga LSI’s sa probinsya.
Wala naman nagalaom si Tuazon matapos nga ulihi na lamang ini nakahibalo nga may yara sang peke nga authorization pass nga posible ginamit sang amo nga LSI agud makapauli sa probinsya kun sa diin nasaad diri nga isa siya ka APOR.
Hugot man sini nga ginpanginwala sang amo nga opisyal bangud suno sa iya wala niya gid ini ginpirmahan.
Mahibaluan nga nag-abot ang amo nga LSI kagab-i sa Roxas City Airport matapos nga ginsugat man sang iya pamilya.
Sa karon, nagapaidalom na ini sa mandatory quarantine sa nasambit nga barangay.
