ROXAS CITY – Ginpabutyag sang isa ka manunudlo sa Bombo Radyo ang iya nabatyagan sa tagsa nga pakamalauton ang mga manunudlo kasunod sang pagsugod sang new normal education subong nga COVID-19 Pandemic.
Sa Good Morning Philippines program ginpahayag ni Mr. Jyp Carlo Catunao, Elementary Teacher sang Tomas Abelita Sr. Elementary School sa banwa sang Pilar, Capiz nga indi lamang ang mga ginikanan ang apektado kundi sila man mismo.
Suno kay Catunao nga kuntani hatagan sang importansya sang tagsa ka mga indibidwal ang ginahimo nila nga mga manunudlo agud nga mapreparar ang mga nagakaigo nga modules para sa mga estudyante.
Ginpahayag sini nga adlaw-adlaw gid sila nagahimo sang panibag-o nga set sang modules agud nga preparado naman sila sa masunod nga releasing.
Indi mahapos ang ila trabaho suno diri bangud kun kaisa ginakulang naman sila sang ila mga kinahanglanon kag oras sa pamilya.
Apang, bilang mga manunudlo luyag lamang nila nga ma-edukar ang mga estudyante agud indi man maapektuhan ang ila pagtuon subong nga pandemya.
Gani, nagpanugyan ini sa mga ginikanan nga kuntani magbuliganay na lamang sa baylo nga magbinasolay.
Dugang pa sini nga nagapatalang lamang sa mga tawo ang mga nagalapta nga mga memes, trolls kag mga fake modules agud pakamalauton lamang ang ginahimo sang mga manunudlo.
Gin-athag man sini nga kun may yara man gid sang problema sa mga modules mahimo man sila nga mag contact personal kag indi na pag-ipalab-ot pa sa social media.
Samtang, nagpanugyan kag nagapasalamat sa gihapon si Catunao sa padayon nga pag-asister kag wala pagpabaya sang mga ginikanan kag estudyante subong nga bag-o na ang sistema sang pagtulun-an.
