ROXAS CITY – Nagsungka sa pamunuan sang Capiz Police Provincial Office (CPPO) ang isa ka Red Fighter sang New Peoples Army (NPA) sang segundo distrito sang probinsya sang Capiz.
Ginkilala ni CPPO Provincial Director Police Colonel Julio Gustilo ang nagsungka nga NPA member nga si alyas Art, 40-anyos.
Suno kay Gustilo nga dala ni alyas Art sa iya pagsungka ang 357 revolver kag lima ka mga bala sa bulig sang mga katapo sang 61st Infantry Battalion kag 3rd Infantry Division sang Philippine Army kag mga opisyal sang barangay.
Pila sa mga rason nga nagtulod kay Alyas Art nga magsungka kag magbalik sa sabak sang panguluhan amo ang kabudlay nga sitwasyon sa kabukiran, wala natuman nga mga pasalig kag ang realisasyon nga indi sabat ang armado nga paghimakas sa mga problema sa pungsod.
Kadungan sang pagsungka ni Alyas Art ang kasiguraduhan nga makabaton sang benepisyo nga dala sang Enchanced Comprehensive Local Integration Program (E-CLIP) nga ginatanyag sang gobyerno.
Nagpanawagan man si Gustilo sa mga nabilin nga mga katapo sang rebelde nga grupo nga magsungka na sa mga otoridad agud mahatagan sang tsansa nga makapangabuhi sang normal kaupod ang pamilya.
Nahibaluan nga tuig 1992 sang nagsulod sa NPA si Alyas Art, apang sang tuig 2006 nagbiya ini tobtob nadesisyunan nga magbalik sa sabak sang gobyerno kahapon nga adlaw Marso 6, 2020.
