ROXAS CITY – Dead on arrival sa ospital ang isa ka lalaki nga lakip sa anom ka mga construction worker nga gin-igo sang kilat sa Brgy. Dayao, Roxas City.
Ginkilala ang napatay kay Ronel Arinque, 24-anyos residente sang Brgy. Barra sang nasambit nga syudad.
Samtang, ginkilala naman ang iban pa nga mga biktima nga sanday Constancio Cabredo, 57-anyos, Remuel Francisco, 30-anyos residente sang Brgy. Mongpong, certain Mac-mac Diodoco residente sang Brgy. Libas, certain Sigay Dela Cruz, 20-anyos, certain Raynold, 40-anyos residente sang Brgy. Bolo, syudad sang Roxas.
Sa pagpakig-angot sang Bombo Radyo kay Joshua Cabredo kaupod sang nasambit nga mga biktima, ginpahayag sini nga napulo sila tanan apang naglakat sila sang tatlo sini ka mga kaupdanan agud magkuha sang butong nga ila ginagamit sa ila trabaho.
Mahibaluan, nga sang nag-ulan nagpanilong ang mga biktima sa trapal nga nahamtang malapit sa ila gina-ubrahan.
Suno pa kay Joshua, nga takna alas 4 kaina sang hapon paghulaw sang mamunog nga ulan, nabalitaan nalang nila nga gin-igo na sang kilat ang anom nila nga mga kaupdanan kun sa diin isa diri ang amay ni Cabredo.
Ginpahayag pa sini, nga pag-igo sang kilat nagkulob nalang si Arinque kag nag-angkon sang pilas sa ulo ang amay niya nga si Contancio Cabredo.
Madasig naman nga ginpadangat sa Roxas Memorial Provincial Hospital ang mga biktima apang gindeklarar sang doktor nga dead on arrival si Arinque.
Sa karun, yara na sa isa ka punerarya ang bangkay ni Arinque samtang nagapabilin sa ospital ang iban nga mga biktima para sa dugang nga pagbulong.
