Pilas sa magkatuhay nga parte sang lawas ang naangkon sang driver sang motorsiklo, matapos aksidente nga bumunggo sa trisikol sa may bahin sang Arnaldo Boulevard, Roxas City.
Ginkilala ang driver sang motorsiklo nga si Joven Dapura, 23-anyos kag residente sang Barangay Cogon, sining syudad.
Samtang ang driver naman sang trisikol ang ginkilala kay Juvy Eudela, 55-anyos nga residente naman sang Barangay Banica, Roxas City.
Sa impormasyon nga nakuha sang Bombo Radyo nagikan sa lugar, papauli na kun tani ang driver sang trisikol sang hinali lamang nga nag-overtake ang driver sang motorsiklo kabangdanan agud magtabog kag matumba ini.
Bangud sa makusog nga impact, nag angkon sang pilas sa ulo ang driver sang motorsiklo.
Mahibaluan nga yara sa impluwensya sang makahulubog nga ilimnon ang driver sang motorsiklo nga wala nakasuksok sang helmet sang natabo ang insidente.
