ROXAS CITY -Ginkompirmar sang Punong Barangay sang Barangay Dayao sining siyudad nga residente nila ang isa sa 10 ka mga Capizeño nga nagpositibo sa COVID-19 sa probinsiya.
Sa interview sang Bombo Radyo kay Punong Barangay Emily Ariza ginpahayag sini nga isa ka 47-anyos nga babayi nga OFW repatriates nga may yara sang history of travel sa pungsod Taiwan ang nagpositibo sa nasambit nga barangay.
Ginpahayag ni Ariza nga nakapauli na ini sa ila nga panimalay sang nagligad nga Sabado matapos nga nagtakop na ang iya 14-day quarantine sa Hortus Botanicus.
Nagapadayon naman ang contact tracing sang nasambit nga barangay sa mga indibidwal nga nakaupod sang nasambit nga OFW.
Indi pa matul-id ni Ariza kun nakaguwa ini sang tion nga nakapauli na ini sa ila balay.
Nagpangabay man si Ariza sang kooperasyon sa mga residente ilabi na sa mga indibidwal nga nakaupod sang nasambit nga OFW.
