Natalana kun tani nga magpauli subong nga Disyembre ang isa sa mga nabiktima sang sunog sa Kuwait, agud surpresahon ang hinipo nga anak sa iya kaadlawan.
Matandaan nga wala nakaluwas sa kamatayon sanday Kein Barros, 37-anyos kag Janeth Delgado nga lunsay mga residente sang Brgy. Casanayan, Pilar, Capiz matapos ginlamon sang sunog ang puluy-an sang ila nga employer sa pungsod Kuwait.
Sa interview sang Bombo Radyo sa tiyo ni Janeth nga si Romeo Delgado, ginpahayag sini nga ginkakibot nila ang nabaton nga balita kung sa diin tubtob subong indi mabaton sang bana sini.
Suno kay Delgado, matapos mahibaluan sang bana ni Janeth ang natabo indi na nila ini ma-istorya pa kag wala na nagasabat sa mga pamangkot.
Mahibaluan nga nasapwan na lamang si Janeth kag Kein sa sulod sang comfort room nga wala na sang kabuhi matapos ginapahayag na-suffocate bangud sa asu.
Sa karun, nagapakig-angut na ang pamilya sa Overseas Workers Welfare Administration (OWWA) agud magpangayo sang bulig nga mapauli na ang bangkay sang ila himata sa Pilipinas.
