Ginkakas sang Miss Universe Philippines (MUPH) Organization ang isa sa mga kandidata sini sa 2026 pageant matapos nga ginpatigayon ang imbestigasyon angot sa ginaalegar indi manami nga batasan sang kandidata.
Sa statement nga ginpagwa sang MUPH, ginpahayag sang organisasyon nga may mga reklamo sila nga nabaton batuk sa nasambit nga kandidata.
Nag-agi ini sa maid-id nga pagrepaso, kag ginhatagan sang verbal kag written letter agud tadlungon ang iya pagginawi.
Apang suno sa MUPH, nagpadayon ang pila ka mga aksyon sang nasambit nga kandidata nga indi nagasanto sa ila standards of respect kag professionalism.
Bangud sini, nagdesisyon ang organisasyon nga indi na pagtugutan nga magpadayon sa kompetisyon ang nasambit nga kandidata.
Wala naman ginpahibalo sang MUPH ang ngalan sang ginkakas nga participant, subong man ang eksakto nga detalye sang insidente.
Gikan sa orihinal nga 51 ka mga kandidata, 50 na lang ang magapasakop sa paindis-indis, kon sa diin pagahiwaton ang coronation night sa Mayo 1 sa Mall of Asia Arena.
