Ginaduso ni Israeli Prime Minister Benjamin Netanyahu ang “military solution” agud maluwas ang ginabanta 20 ka nabilin nga mga hostages nga ginahuptan pa sang Hamas halin sang Oktubre 7, 2023.
Suno sa report, ginpahayag sang isa ka opisyal sang Israel nga nagapadayon ang relasyon sa tunga sang Israel kag Estados Unidos, bangud maathag nga indi interesado ang Hamas sa isa ka kasugtanan para sa paghilway sang mga hostage sang Israel.
Bangud sini, luyag ni Netanyahu nga palaparon ang mga operasyon militar sa Gaza agud mapilit ang paghilway sa mga hostages.
Madumduman nga linibo ka mga pumuluyo ang nagprotesta sa Tel Aviv sang Sabado agud magdemanda sa gobyerno nga tapuson ang giyera kag gilayon nga ibalik ang nabilin nga mga hostages.
Kadungan sini, nagtaas ang pangkalibutanon nga kabalaka sa nagalala nga krisis sa gutom sa Gaza.
Suno sa Gaza Health Ministry nga ginapadalagan sang Hamas, masobra 175 ka tawo, lakip ang 93 ka kabataan, ang napatay bangud sa malnutrisyon.
Bisan pa nagapamilit ang Israel nga nakadala ini sing bastante nga humanitarian aid, ang mga internasyonal nga organisasyon nagasiling nga indi ini bastante, kag ang pila ka duog sa Gaza yara sa katalagman sang tiggulutom.
