Ginpaambit sang aktres nga si Jackie Lou Blanco ang tuman nga kasubo sang iya pamilya matapos nga nagtaliwan ang iya iloy nga si Pilita Corrales kag ang iya anay bana nga si Ricky Davao sa sulod lamang sang isa ka bulan.
Sa isa ka interbyu sa Malacañang sang Domingo, sa diin si Corrales ginhatagan sang Presidential Medal of Merit, si Blanco emosyonal nga nagsiling, “It’s been really very hard… we’re still grieving for my mom and now we’re grieving for Ricky. It’s just hard.”
Nahibaluan nga nagtaliwan si Corrales, isa ka beterana nga singer sa edad nga 87 samtang nagakatulog sang nagligad nga bulan sang Abril. Si Davao, isa ka kilala nga aktor kag amay sang ila tatlo ka mga kabataan, ang napatay sa edad nga 63 bangud sang komplikasyon sa cancer.
Ginpanugyanan sini sa iya mga kabataan nga pasidunggan ang handumanan sang ila amay kag lola paagi sa pagkamaayo nga mga tawo kag pagpaambit sang mga leksyon nga ila ginbilin.
Madumduman nga nagsugod ang haya ni Davao sang Mayo 4 sa Heritage Park, Taguig, kag magatakop sa Mayo 6. Si Corrales ginlubong sa amo man nga sementeryo pagkatapos sang iya cremation sang tunga-tunga sang Abril.
