ROXAS CITY – Desidido nga magpasaka sang panumbungon ang isa ka negosyante nga ginaalegar ginpahog sang kilala man nga negosyante sa siyudad sang Roxas.
Suno kay Jannette “Barbz” Vasquez nga nakahanda siya nga pasakaan sang panumbungon si Patrocenio Chiyuto Jr., ukon mas kilala sa tawag nga Don Chiyuto bangud sa mga malain nga tinaga nga ginhaboy sa iya pinaagi sa isa ka tawag sa cellphone.
Ginpahayag ni Vazquez nga tuman na nga naapektuhan ang iya nga pamilya rason nga amo ini nagtulod sa iya nga padayunon ang nasambit nga tikang.
Ini may kaangtanan sa duha ka investment scheme sa probinsya nga naga-operate kun sa diin miyembro ang duha ka nasambit nga persona.
Suno kay Vasquez nga ginaalegar ginpasimandan siya ni Don Chiyuto nga siya ang nagpalapta sa mga investors nga scammer ang nasambit nga negosyante apang hugot niya man ini nga ginpanginwala.
Sa baylo gin-abisohan pa sini suno sa natungdan ang mga naga-invest kay Chiyuto nga mangin maalam sa pag-invest sang ila nga kwarta.
Magluwas diri, suno pa kay Vaspquez nga naluoy pa ini kay Chiyuto bangud madamo na ini sang nabuligan samtang ang mga tawo ang nagahulat lamang nga hatagan.
Kasunod sini, gintawgan ni Don Chiyuto si Vasquez kun sa diin nakarekord mismo sa iya cellphone ang mga pamahog nga ginhambal sa iya sang amo nga negosyante nga pugotan siya sang ulo kag palukpan sang granada.
Dugang pa ni Vasquez nga halos ginakontra siya sang kadam-an bangud sa ginaalegar siya ang nagpangolekta sang mga kwarta nga naga-invest sa ila nga Investment Scheme nga Big Dreams International (BDI) samtang kay Chiyuto naman amo ang Chiyuto Creative Wealth Document Facilitation Services (CCWDFS).
Apang, ginpanindugan sini nga mas nauna pa sa iya si Chiyuto sa pag-invest sa BDI rason nga na-engganyo man ini nga mag-invest sa nasambit nga Investment Scheme.
Hugot naman nga ginpanginwala sini nga siya nagtaban sang mga kwarta sang mga investors nga wala naka pay-out.
Mahibaluan nga may yara sang registration fee nga P7,500 sa pag-invest sa BDI samtang sa CCWDFS naman ginapahayag nga naga-invest sang kwarta ang mga investors nga P10,000 kun sa diin ginatanyagan sila sang double pay-out.
Magluwas diri, madamo naman sang mga investors nagikan sa BDI ang nagpabutyag man sa social media matapos nga wala nabalik sa ila ang gin-invest nga kwarta sa BDI rason nga ginpakamaayo nila nga magsaylo sa CCWDFS.
