Nagdangat na sa P6.83 billion ang balor sang kahalitan nga ginbilin sang bagyong Kristine sa sektor sang pangunguma.
Ini ang suno sa updated report sang Department of Agriculture – Disaster Risk Reduction and Management Operations Center (DRRMO).
Naghabok man sa 171,080 ang numero sang mga mangunguma kag pagpangisda naapektuhan sa pagpanglaslas sang nasambit nga bagyo nagikan sa 143,000, duha ka adlaw na ang nakaligad.
Naglab-ot na man sa 317,316 metriko tonelada ang natumod nga production loss nagikan sa 141,971 ektarya sang mga ulumhan nga naapektuhan.
Nagapabilin sa gihapon nga pinaka-apektado ang rice industry nga nag-angkon na sang kabug-usan nga P5.05 billion nga kahalitan samtang ang nahabilin ang gintunga-tungaan na sang mga industriya sang mais, fisheries, poultry, kag iban pa.
Sa karon, wala pa sang datos angut sa kahalitan nga ginbilin sang Super Typhoon Leon sa sektor sang pangunguma.
Suno sa DA, indi sa gihapon manami ang weather situation sa mga lugar nga naapektuhan sang nasambit nga bagyo para sa paghiwat sang field validation.
