Naglab-ot sa ₱188 milyones ang kahalitan sa agrikultura kag imprastraktura sa rehiyon sang Western Visayas bangud sang asud-asod nga pag-igo sang malain nga panahon.
Base sa pinakabag-o nga monitoring sang Regional Disaster Risk Reduction and Management Council (RDRRMC) Region 6, sa kabug-usan nga danyos, ginreport nga ₱27 milyones ang halit sa sektor sang agrikultura, samtang ₱161 milyones naman ang sa imprastraktura.
Ang mga napektuhan nagalakip sang mga pananum, kagamitan sa uma kag pagpangisda, kag mga pasilidad nga yara sa mga probinsya sang Aklan, Antique, kag Capiz.
Samtang, ginreport man nga masobra 500 ka mga balay sa Western Visayas ang naguba ukon nahalitan bangud sang malain nga tiempo, nga padayon nga ginamonitor sang mga ahensya sang gobyerno.
Padayon naman ang paghatag sang bulig sang mga ahensiya sa mga apektado nga lugar.
