ROXAS CITY, CAPIZ – Ginpatigayon sang Provincial Disaster Risk Reduction and Management Office (PDRRMO) sang Capiz ang Provincial Rescue Olympics 2025 sa Villarreal Stadium sa syudad sang Roxas bilang pagpreparar batuk sa mga kalamidad.
Sa interview sang Bombo Radyo Roxas kay Atty. Sheila Artillero, pinuno sang PDRRMO-Capiz, iya ginpaathag nga tinutuyo sang aktibidad nga mapakita kag ma-challenge ang kahandaan, ihibalo, kag koordinasyon sang mga rescue team gikan sa syudad sang Roxas kag nagkalain-lain nga banwa sa probinsya.
Pinaagi sa mga paindis-indis kag paghanas, masukat ang kabakod, disiplina, kag kasagad sang kada grupo sa pagresponde sa mga sitwasyo nga kasubong sang linog, sunog, baha, kag iban pa nga sahi sang kalamidad.
Suno pa kay Artillero, importante ang padayon nga training kag pagbinuligay sang mga local responder agud mas madasig kag makahulag sang maayo sa oras sang matuod nga kalamidad.
Nagpasalamat man ang natungdan sa tanan nga nagpasakop kag ginsiguro nga magapadayon ang mga kasubong nga aktibidad para masiguro ang kaluwasan sang tanan nga pumuluyo sang Capiz.
– Reported by: Bombo Sunnie Mae Constantino Batencila
