Ginpahayag sang tagdumalahan sang indi na luyag paghingadlan nga birthing clinic sa Poblacion Sur, Sigma, Capiz nga ang rason sa kamatayon sang Misis nga nagbun-ag-patay ang isa ka pinasahi nga komplikasyon sa pagbun-ag.
Sa pagpakig-angut sang Bombo Radyo sa midwife kag subong man tag-iya sang pribado nga birthing clinic, gintumod niya nga ang rason sa kamatayon sang 29-anyos nga ginang nga si Joemay Castañales ang ginatawag nga ‘Uterine Atony’ isa ka ‘rare case’ nga komplikasyon sa pagbusong kun sa diin ang matres sang babayi wala naga-contract ukon wala nagatig-a matapos magbun-ag, rason nga gulpi nagpuswak ang dugo, kag delikado kun mahubsan sang dugo ang pasyente.
Ginpanindugan diri sang midwife nga wala sila nagpabaya sa amu nga emerhensiya, sa pagkamatuod, matapos nga magbata kag makaguwa ang inunlan sang pasyente mga alas-10:30 sang gab-i, nagsugod nga wala untat ang pagdugo mga alas-10:45, kag alas-11 sa gab-i sang na-transfer ini sa Mambusao District Hospital kaupod ang OB-Gyne.
Apang, pag-abot sa amu nga ospital wala sang available nga AB+ nga dugo agud igatughong sa pasyente, gani gin-transfer naman ini sa Roxas Memorial Provincial Hospital kag gindiretso sa Intensive Care Unit (ICU).
Ginpahayag nga sa napulo ka bag nga dugo nga kinahanglan itughong sa Ginang, bangud sa kakulangon sang dugo, tatlo lamang diri ang natughong, kag mga alas-7 pagka-aga, ginbawian ini sang kabuhi.
Nahibaluan nga ginlaygayan man ang pasyente nga sa ospital nalang magbata bangud dako ang iya tiyan, apang nagpahayag suno diri ang pasyente nga sa ila birthing clinic nalang bangud kumportable ini kag diri naman nakabun-ag sa una niya nga bata.
Samtang, ginpahayag sang OB-Gyne nga ang rason sa iya pagkuot sa kinatawo sang pasyente amu agud mapunggan kuntani ang pagpuswak sang dugo, kag ginatawag ini nga bi-manual compression sang doktor.
Naluoy man ang tagdumalahan sang birthing clinic sa napatay nga pasyente, apang nahimo naman nila ang ila masarangan kag luyag kuntani nga ipaintindi sa pamilya ang natabo.
Matapos ang insidente sang Pebrero 1, nagpadulong ang katapo sang Department of Health (DOH) Capiz kag Provincial Health Office (PHO) sa amu nga pasilidad kag nagpatigayon sang imbestigasyon.
Sa karon, ginahulat nalang sang birthing clinic ang amu nga imbestigasyon.
