Handa na ang legal defense ni anay Presidente Rodrigo Duterte para sa confirmation of charges hearing sa International Criminal Court (ICC) nga natalana nga magasugod sa Setyembre 23, 2025.
Base sa dokumento nga ginsumiter sa Pre-Trial Chamber I sang Agosto 22, gin-anunsyo ni Nicholas Kaufman nga maga-alokar sila sang 30 minutos kada isa para sa opening kag closing statements, samtang tatlo tubtob apat ka oras ang iga-alokar para sa oral presentation sang depensa.
Ang nasambit nga hearing ang kabahin sang proseso agud madeterminar kun may yara sang bastante nga ebidensiya agud mapadayon ang full trial batok kay Duterte bangud sa mga alegasyon sang krimen batok sa katawhan may kaangtanan sa iya kontrobersyal nga kampanya kontra droga.
Suno sa mga report, masobra 7,000 ka tawo ang napatay sa mga operasyon halin 2016 tubtob 2019, bisan pa nga ginabulubanta sang mga grupo sang tawhanon nga kinamatarung nga ang aktwal nga numero mahimo nga maglab-ot sa 30,000.
Sa iya pahayag, ginpanindugan ni Kaufman nga wala sang krimen nga nahimo si Duterte kag matutom kag may bugal nga nagserbisyo sa pungsod sa sulod sang madamo nga tinuig.
Ginalauman sang iya kampo nga magatutok ang depensa sa mga legal nga argumento angot sa hurisdiksyon sang ICC, ang ginapahayag “politically motivated” nga kinaiya sang kaso, kag ang kakulang sang direkta nga kahilabtanan ni Duterte sa mga pagpamatay.
Matandaan ng gin-aresto si Duterte sang mga otoridad sa Pilipinas sang Marso 11, 2025, base sa arrest warrant nga ginpaguwa sang ICC kag priso ini sa gihapon sa Scheveningen Prison sa The Hague.
Kapin sa 300 ka mga biktima sang kampanya kontra droga ang nagsumiter sang aplikasyon agud magpasakop sa pre-trial proceedings.
Indi na kinahanglan nga magbiyahe pakadto sa The Hague ang mga biktima bangud pagarepresentar sila sang mga legal representatives, lakip na si Atty. Kristina Conti sang National Union of Peoples’ Lawyers (NUPL) kag Atty. Gilbert Andres kag iban pa.
Kon kumpirmahon sang Pre-Trial Chamber ang mga alegasyon, ang kaso magapadayon sa isa ka full trial nga mahimo maglawig sang pila ka tuig.
Apang, kon indi, mahimo nga ibasura ang kaso, isa ka butang nga ginapamatukan gid sang mga biktima kag sang ila mga abogado.
Ginalauman nga magalawig sang pila ka adlaw ang hearing, kag mangin sentro sang internasyunal nga atensyon bilang isa sa pinakadako nga human rights accountability cases sa maragtas sang Pilipinas.
