Nakarekober si Atty. Raymund Palad, abogado ni Ramil Madriaga, sang mga text message kag screenshot nga ginaalegar nagapakita sang personal nga koneksyon sa mga tawo gikan sa security circle ni Vice President Sara Duterte.
Ang mga mensahe halin sa anay security officer ni Duterte nga si Col Dennis Nolasco kag nagaunod sang detalye sang mga bank kag digital payment accounts.
Suno kay Palad, gintinguhaan sini nga magdeposito sa Landbank kag GCash accounts nga ginsambit sa mga mensahe, kag iya ginkumpirma nga aktibo ang mga ini.
Ang mga text messages (halin 2022–2023) nagaunod sang kaswal nga mga paghambalanay parte sa mga gasto kag mga hilikuton, subong man sang mga paghinun-anon parte sa confidential fund nga ginhambalan sa Kongreso.
Ang mga screenshot ang nagikan sa Facebook Messenger account ni Madriaga nga nakuha sang iya mga himata.
Yara pa sa kustodiya sang PNP ang tatlo ka mga cellphones ni Madriaga nga mahimo may unod nga dugang nga ebidensya sa tion nga ma-forensically examine.
Matandaan nga nagtuhaw bilang potential witness si Madriaga sa impeachment complaint batok kay VP Duterte, matapos ginpahayag sini nga may yara ini sang direkta nga kaangtanan sa iya anay boss.
