Patay ang isa ka kandidato sa pagka-alkalde matapos nga ginlabo sang iya kaugalingon nga utod sa Barangay Duran, Dumalag, Capiz.
Ginkilala ang biktima nga si Jose Sonny Felarca, 60-anyos samtang ang ginatudlo naman nga suspek ang iya mismo kaugalingon nga utod nga si Walter Felarca, 58-anyos kag lunsay mga residente sang nasambit nga barangay.
Sa nakuha nga impormasyon sang Bombo Radyo sa Dumalag PNP, base sa imbestigasyon sang mga ini may natabo nga pagbinaisay sa tunga sang mag-utod kag ginaalegar nga may dala nga hinganiban ang suspek nga amo ang gingamit sa paglabo sa iya utod nga biktima.
Nag-angkon sang patal nga pilas sa ulo kag iban pa nga parte sang iya lawas ang biktima nga gilayon naman nga ginpadangat sa ospital apang gindeklarar ini nga dead on arrival sang nag-atendir nga doctor.
Madasig naman nga nagpalagyo ang utod sini nga suspek apang sa ulihi, boluntaryo ini nga nagsungka kaupod ang isa ka opisyal sa ila nga barangay.
Ang ginalantaw naman sa karon sang mga kapulisan ang madugay na nga hiligut-anon sang mag-utod ang nangin sa rason sa nasambit nga krimen.
