ROXAS CITY – Narekober ang kapin tunga sa milyon nga balor sang iligal nga droga, pinaagi sa drug buy bust operation sang gintingub nga puwersa sang Regional Police Drug Enforcement Unit (RPDEU) kag Panitan Municipal Police Station, sa Medalla Milagrosa National Housing Authority (NHA) sa Brgy. Timpas, Panitan, Capiz.
Ginkilala ang mga nadakpan nga sanday Harry Devera alyas “Bethol” nga amu nga subject person; Kent Francis Ortez alyas “Kenken” 18-anyos kag Lorenzo Bustamante alyas “Renzo” nga mga residente sang Brgy. Concencia, sa amu nga banwa.
Nakuha sa paghinakop sang mga suspek ang 24 tanan ka sachets sang shabu kun sa diin 23 diri ang nakuha kay Devera subong man ang .38 caliber revolver nga loaded sang duha ka mga bala kag cellphone; P1,650 nga kaugalingon nila nga kuwarta; pouch; weighing scale kag aluminum foil.
Ginabulubanta nagabug-at ang iligal nga droga sa 65 gramos nga may estimated standard drug price sa P442,000.
Magapangatubang sang kaso nga paglapas sa Republic Act (RA) 9165 ukon “Comprehensive Dangerous Drugs Act of 2002” ang tatlo ka mga nadakpan kag dugang nga kaso nga paglapas sa RA 10591 ukon “Comprehensive Law on Firearms and Ammunition Regulation Act” si Devera.
Sa karon, nagapabilin ang mga ini sa Panitan Municipal Police Station para sa nagakaigo nga disposisyon.
