ROXAS CITY – Nagaapelar si Punong Barangay Richard Arrojado sang Barangay Libas, Roxas City kay City Mayor Ronnie Dadivas nga pahanugutan kuntani ang mga magagmay nga mangingisda sa nasambit nga barangay nga makapanagat agud makahulik sang isda.
Suno kay Arrojado naluoy ini sa mga residente bangud ang pagpangisda gid lamang ang ila ginasaligan para sa ila pang-adlaw adlaw nga kinahanglanon.
Ginpahayag sini nga halos 90 porsyento sa mga residente sang barangay ang lunsay pagpanagat ang palangabuhian gani indi mahimo nga ipauntat ini.
Kuntani suno kay Arrojado nga kun gin-lockdown man ang Libas fishing port, ang mga dalagkuan lamang nga sakayan ang dumilian nga magpalawod agud magpangisda.
Ginklaro ni Arrojado nga wala man nagadungka sa nasambit nga port ang magagmay nga mga mangingisda.
Wala man suno diri sang ikasarang ang barangay agud mapun-an ang pang-adlaw adlaw nga kinahanglanon kag pagkaon sang mga apektado nga mga mangingisda.
Ginkompirmar ni Arrojado nga tuman ka strikto sa karon ang mga pagsulundan sa ila lugar bangud bisan ang magagmay nga mangingisda nga magapalawod kuntani agud magpangisda ang ginasita kag ginapabalik sang mga otoridad.
