ROXAS CITY – Wala namutikan sang kapitan sang Barangay Bangon-Bangon banwa sang Sigma nga may nagapatigayon sang illegal quarry operation sa iya barangay.
Sa interview sang Bombo Radyo kay Punong Barangay Resty Macario, Kapitan sang Barangay Bangon-Bangon, ginsiling sini nga wala ini nagmitir magtsekyar bangud man sa boundary sang Sigma kag Dao nahamtang ang quarry site kag may nakabutang nga private property nga ginapanag-iyahan suno diri sang isa ka opisyal sa banwa sang Dao.
Suno diri, nagkoordinar ang kapulisan sa iya nga may igapatigayon nga pagpangdakop kaupod ang Capiz Provincial Environment and Natural Resources Office (CaPENRO) kag Municipal Environment and Natural Resources Office (MENRO)-Sigma kag gilayon man sini ginpaupod iya duwa ka mga kagawad kun sa diin nasaksihan sang mga ini ang aktwal nga pagpangdakop.
Dugang pa sini nga alas 6:00 sa gab-i nagasugod sa pagquarry ang mga trabahador tubtob na sa hanagob kun sa diin ginreklamo man sang pila ka pumuluyo nga nagaisturbo sa ila pagpahuway.
Magapatawag naman si Kapitan Macario sang emergency meeting buwas agud mahinalian niya kaupod sang iya opisyales ang pagbantay sa lugar.
Sa karon, yara sa ila posesyon ang backhoe nga nakumpiskar kag pagaimbestigahan ang naulamid nga Barangay Tanod bangud suno diri indi niya pag-itolerar ang malain nga buluhaton.
