PANAY, CAPIZ – Wala pa sang person of interest ang kapulisan sa natabo nga pagluthang-patay sa isa ka Army Reservist sa Barangay Poblacion Ilaya, Panay, Capiz.
Sa interview sang Bombo Radyo kay PCAPT Ronald Ton-ogan, Hepe sang Panay Municipal Police Station, iya ginpahayag nga padayon pa nila nga ginaimbestigaran ang natabo nga insidente.
Suno, kay PCAPT Ton-ogan, base sa nakakita sa lugar, duha ka persona ang sakay sang motorsiklo apang isa lang ka persona ang nakit-an nga nangamot sa pagluthang-patay sa biktima sa atubang sang grocery store.
Matandaan nga ginkilala ang biktima nga si alyas “Totong”, yara sa legal nga pang-edaron kag residente sang Barangay Tacas, Pontevedra, Capiz kag temporaryo lamang nga nagapuyo sa Panayville, sa banwa sang Panay.
Narekober sa lugar ang pito (7) ka mga basiyo sang bala sang gina-alegar caliber .45 nga armas-luthang.
Sa karon, padayon pa ang imbestigasyon sang mga otoridad, angut sa nasambit nga insidente.
– Interviewed by: Bombo Jessa Mae De Los Santos
