ROXAS CITY – Preparado ang mga katapo sang Philippine Coast Guard (PCG)-Capiz kadungan sa pagdagsa sang mga pumuluyo sa baybayon kadungan sa pagselebrar sang kapistahan ni San Juan Bautista.
Ini ang ginpahayag ni PCG Chief Petty Officer Arnel Nisola, Deputy Station Commander for operation, sang mainterview sang Bombo Radyo.
Suno diri nga alerto ang ila bug-os nga hubon kag magapahamtang sang tinawo sa mga masami ginapadulongan sang mga pumuluyo, agud makaresponde sa wala ginapangayo nga emerhensiya.
Ginalauman man ang pagdagsa sang mga pumuluyo ilabi na sa kaorn nga kahapunanon.
May ginpahamtang man nga istasyon sang first aid responders kag visible man sa lugar ang mga katapo sang PNP, BFP, RCERT, Red Cross kag TMU.
Panugyan sang mga responders nga mangin mahalong sa pagselebrar sang kapistahan ni San Juan Bautista, ilabi na nga yara pa sa karon sa tion sang pandemya.
