ROXAS CITY – Nagapabilin nga blangko sa karon ang mga kapulisan sang Roxas City Police Station sa pagkakilan-an sang suspek nga nagtaban sang kwarta kag pila ka mga kagamitan sang nagaserbi bantay sang pasyente sa Intensive Care Unit (ICU) sang Roxas Memorial Provincial Hospital (RMPH).
Sa interview sang Bombo Radyo Roxas kay Police Master Sergeant Ronnie Recto, imbestigador sang Roxas City Police Station, indi pa makilala tubtob sa karon kun sino ang yara sa likod sang nasambit nga insidente.
Suno kay Recto, apisar nga nakita sa CCTV footage ang isa ka lalaki nga nagasuksok sang puti nga long sleeve kag madasig nga nakapalagyo, indi ini madasig nga makilala bangud nakasuksok ini sang face mask kag face shield.
Sandig man sa pagpangusisa sini sa mga gwardya, ginapahayag nga indi man empleyado sang nasambit nga ospital ang suspek kun pagabasehan lamang ang panglawason sini nga nakita sa CCTV footage.
Suno kay Recto nga matapos gintaban sang suspek ang kwarta kag mga kagamitan, gilayon ini nga nagsakay sa tricycle kag nagpadul-ong sa Bus Terminal nga nahamtang sa Barangay Lawaan, Roxas City.
Dugang pa sini nga nagadalagan alas 2 sa kaagahon natabo ang pagpangawat kun sa diin ginlagas pa ang suspek sang mga otoridad apang wala madakpan.
Samtang, ginpasalig naman ni Recto nga pagagatukan sang mga kapulisan ang nasambit nga insidente.
Matandaan nga nabugtawan na lamang ni Ramonsita Ventura nga wala na ang belt bag sini nga may unod nga P2,000, duha ka mga cellphones kag mga valid ID’s.
Ginpahayag sini nga P2,000 na lamang kuntani ang iya nga kwarta para sa pagbakal sang bulong sang iya bana nga na-stroke bangud nabudlayan man ini sa pagpangabuhi bangud nagapang-scrap lamang ang ila trabaho.
Magluwas sa iya, gintaban man sang kawatan nga nakasuksok sang puti nga long sleeves ang duha ka mga cellphone sang iban man sini ka mga kaupdanan.
Mahibaluan nga antes pa man ang insidente nabatyagan pa nila ang suspek sa sulod sang ICU bangud nakasandad pa ini sa tiil sang isa sa mga bantay sang mga pasyente apang wala man sila nagalaom nga kawaton ang ila mga kagamitan.
