ROXAS CITY-Arestado ang 33-anyos nga lalaki matapos nga nadakpan sa akto nga nagagamit sang iligal nga droga sa Barangay Punta Tabuc, Roxas City.
Ginkilala ang suspek nga si Geinro Acaylar, residente sang amo lugar.
Sandig sa inisyal nga imbestigasyon sang Roxas City Police Station nga nakabaton ini sila sang pagpanawag gikan sa kay George Avelino, 40-anyos residente man sa amo nga lugar matapos nga nakita sini si Acaylar nga nagagamit sang iligal nga droga sa guha sang puwertahan sang ila nga panimalay.
Gilayon nga nagresponde ang mga kapulisan kun sa diin nadakpan sa akto si Acaylar.
Nakuha sa posesyon sang suspek ang isa ka plastik sachet sang ginapatihan shabu kag mga drug paraphernalias.
Sa karon nakahunong na karsel sa Roxas City Police Station si Acaylar kag natalana nga pasakaan sang panombongon sa paglapas sa R.A. 9165 ukon Comprehensive Dangerous Drug Act of 2002.
