Lalaki, nadakpan nga nagapatigayon sang iligal nga pasugal sa banwa sang Pontevedra

ROXAS CITY – Arestado ang isa ka persona matapos nadakpan sang katapo sang kapulisan nga  nagapataya sang iligal nga pasugal sa Barangay Tacas, Pontevedra, Capiz.

Ginkilala ang nadakpan nga si alyas Joel, 57-anyos nga residente sang nasambit nga Barangay.

Base sa nakuha nga impormasyon nagikan sa Pontevedra Municipal Police Station, nadakpan sa akto ang amo nga lalaki pinaagi sa nagpakuno-kuno nga poseur bettor nga mataya sa nasambit nga iligal nga pasugal.

Nakuha sa paghinakop sang arestado ang isa ka notebook, ballpen nga itom, P50 nga mark money, P33 coins kag P130 nga cash.

Sa karon, yara na sa kustodiya sang Pontevedra PNP ang nasambit nga arestado para sa nagakaigo nga disposisyon.