SAPIAN, CAPIZ – Patay na sang masapwan ang 32 anyos nga soltero sa isa ka suba sa Sitio Anoy, Barangay Maninang, Sapian, Capiz.
Ang biktima ang ginkilala nga si Renan Soriano, residente sang nasambit man nga lugar.
Base sa impormasyon nga nakuha sang Bombo Radyo sa Sapian Municipal Police Station, nakit-an sang grupo sang mga pamatan-on nga nagapaligo sa suba nga nagapautaw-utaw ang biktima kag wala na sang kabuhi.
Sa dugang nga pagpangusisa, nahibaluan nga nag-inom ang biktima sang makahulubog nga ilimnon antes ini nagbiya sa ila balay kag wala nagpahibalo kun sa diin ini magakadto.
Ginakakibot na lamang sang pamilya ni Soriano sang gintundaan sila nga nasapwan na lamang nga wala na sang kabuhi ang ila himata.
Wala naman sang nakita nga mga pilas sa lawas sang biktima nga nagapatimaan nga hungod ini nga ginpatay.
Kumbinsido ang pamilya nga posible nadanlog ang ila himata sa suba nga nagresulta sa iya nga pagkalumos.
