CUARTERO, CAPIZ – Napasakaan na sang kaso ang lalaki nga nadakpan nga nagabitbit sang armas-luthang sa banwa sang Barangay Agdahon, Cuartero, Capiz.
Ang suspek amo si alyas Baro, 42-anyos kag residente Naic,Cavite, apang temporaryo nga nagapuyo sa lugar.
Sa interview sang Bombo Radyo kay Police Captain Jesse Lepaña, Hepe sang Cuartero Municipal Police Station, iya ginpahayag nga may nabatian ang isa ka Police Patrolman nga may naga pangluyaw sa guwa sang iya sini nga balay kag nagapanghangkat sang away.
Sang naguwa ang pulis agud lantawon, nakit-an sini suspek nga may bitbit nga armas gani madasig niya ini nga ginpalapitan kag ginkompronta.
Suno kay Lepaña, nagtinguha pa nga magpalagyo ang suspek apang gilayon man nga nadakpan.
Pahayag pa niya, nakuha sa paghinakop sang suspek ang caliber 45 nga armas, isa ka magazine kag anum ka mga bala.
Sa subong, yara na sa kustodiya sang Cuartero Municipal Police Station ang suspek kag nagapasakaan na sang kaso nga paglapas sa Republic Act 10591 ukon Comprehensive Firearms and Ammunition Regulation Act.
