ROXAS CITY — Patay na sang makalab-ot sa Roxas Memorial Provincial Hospital ang hubog nga lalaki nga natiruhan matapos magmaoy sa Sitio Cablatan, Barangay Cagay sining siyudad.
Pilason man ang katapo sang Roxas City PNP nga nagresponde sang gintuyo sini nga agawon ang dala nga sanduko sang lalaki antes ini natiruhan.
Base sa impormasyon nga nakuha sang Bombo Radyo, nagpanawag sang responde si Punong Barangay Moreno Gonzaga sa pulisya bangud nagawaras sa ila balay ang hubog nga si Michael Beliber, 31-anyos, residente sang amo man nga barangay.
Gilayon man nga nagresponde si PO2 Rolyn Boy Fernandez kaupod ang mga katapo sang Barangay Peacekeeping Action Team sa balay ni Beliber.
Suno diri, gintinguhaan nga maagaw ni Fernandez ang sanduko ni Beliber apang nagbato ang lalaki kag ginhana pa nga lab-on ang pulis.
Ginapahayag nga nakabati na lamang sila sang duha ka mga lupok kag nakita si Beliber nga nagahamyang sa duta kag may igo sang bala sa iya dughan kag kilikili.
Apang indi pa matumod kun sin-o ang responsable sa pagtiro kay Beliber.
Narekober sa ginluntaran sang insidente ang isa ka kalibre .45 nga armas luthang kag duha ka mga basiyo sang amo man nga armas kag sanduko nga nagalaba sang 20 pulgadas.
